Þetta skotlíður allt saman. Búinn að vera hérna í tíu daga sirka. Fannst mér fyrst í dag vera eitthvað aðeins meira en tótal byrjanda í rússnesku þegar ég gat maukað saman einni ágætri setningu. Kennarinn minn var hrifinn. Í morgun setti hún fram þá kenningu að eina mögulega skýringin á því að ég vildi læra rússnesku væri til að græða peninga ... á einhvern hátt. Að ég væri bara að leika mér fannst henni ótrúverðugt. Kenndi mér að segja það á rússnesku...

En annars sagði hún mér að flestir sem kæmu til hennar að læra rússnesku væri bissnessfólk sem væri í leit að frægð og frama. Hefði t.d. sótt um vinnu sem krefðist þess að menn lærðu rússnesku. Þetta er ekki skrítið, enda mikið gullgrafaraæði hér eins og í Moskvu, þótt skalinn sé sennilega öllu minni. Mikið um feita kalla á allt of flottum bílum miðað við almennan efnahag hérna. Þeir eru síðan oft með einkabílstjóra til að passa bílana og sitja í þeim þar sem þeir leggja - yfirleitt - ólöglega...

Annars er ótrúlega mikið líf í Kænugarði. Allt er yfirfullt á einn eða annan hátt. Göturnar eru yfirfullar, gangstéttarnar yfirfullar, metróinn er yfirfullur. Og allt á nánast alveg sama hvaða tíma sem er. Hvort sem það er á annatíma eða ekki...

Ligg hér í rúminu með lappann í kjöltunni og nýbúinn að bera á mig smá smyrsl eftir flamberingu laugardagsins. Hefði átt að vera hálftíma styttra í sólbaðinu...